संरक्षण मंत्री राजनाथ सिंह आज सियाचीन दौऱ्यावर, जगातील सर्वात उंच युद्धभूमीवरील सैनिकांशी संवाद साधणार आहेत

संरक्षण मंत्री राजनाथ सिंह सोमवारी सियाचीनला भेट देणार असून जगातील सर्वोच्च युद्धभूमीवर तैनात असलेल्या सैनिकांशी संवाद साधणार आहेत. संरक्षणमंत्र्यांच्या कार्यालयाने ‘एक्स’वर ही माहिती दिली. होळीच्या निमित्ताने राजनाथ सिंह यांचा सियाचीनला जाऊन सैनिकांसोबत सण साजरा करण्याचा कार्यक्रम होता, मात्र खराब हवामानामुळे त्यांचा कार्यक्रम पुढे ढकलण्यात आला होता. त्यावेळी संरक्षण मंत्री लेहमध्येच जवानांसोबत होळी साजरी करून परतले होते.

उल्लेखनीय आहे की, गेल्या आठवड्यात भारतीय लष्कराने सामरिकदृष्ट्या महत्त्वाच्या सियाचीन ग्लेशियरवर आपल्या उपस्थितीला 40 वर्षे पूर्ण केली. काराकोरम पर्वतरांगेत सुमारे 20,000 फूट उंचीवर असलेले सियाचीन ग्लेशियर हे जगातील सर्वोच्च लष्करी क्षेत्र मानले जाते, जेथे सैनिकांना हिमवादळ आणि जोरदार वाऱ्याचा सामना करावा लागतो.

आपल्या ‘ऑपरेशन मेघदूत’ अंतर्गत, भारतीय सैन्याने एप्रिल 1984 मध्ये सियाचीन ग्लेशियरवर आपले संपूर्ण नियंत्रण स्थापित केले. गेल्या काही वर्षांत भारतीय लष्कराने सियाचीनमध्ये आपली उपस्थिती मजबूत केली आहे. गेल्या वर्षी जानेवारीमध्ये, आर्मी कॉर्प्स ऑफ इंजिनीअर्समधील कॅप्टन शिवा चौहान यांना सियाचीन ग्लेशियरमधील फ्रंटलाइन पोस्टवर तैनात करण्यात आले होते, ही एका मोठ्या रणांगणात महिला लष्करी अधिकाऱ्याची अशी पहिली ऑपरेशनल तैनाती होती.