Sangharsh Yatra www.sangharshyatra.com
स्वराज्य जनजागृती परिषदेच्या कार्यकर्त्यांचा मराठवाडा विभागीय मेळावा
१४ सप्टेंबर रोजी मोठ्या संख्येने उपस्थित रहा – ॲड. अजित देशमुख
बीड दि.७ (प्रतिनिधी) सामाजिक स्तरावर मोठ्या प्रमाणात काम करण्यासाठी स्वराज्य जनजागृती परिषदेची स्थापना झाली आहे. या माध्यमातून लोकशिक्षण आणि लोकजागृतीसाठी कार्यकर्त्यांची फळी तयार करायची आहे. त्याच बरोबर भ्रष्टाचाराला विरोध देखील कायम ठेवायचा आहे. परिषदेच्या कार्यकर्त्यांचा मराठवाडा विभागीय स्तरावरील मेळावा रविवार दिनांक १४ सप्टेंबर २०२५ रोजी आयोजित केला असून या मेळाव्याला सर्व स्तरातील कार्यकर्त्यांनी आवर्जून उपस्थित रहावे, असे आवाहन स्वराज्य जनजागृती परिषदेचे अध्यक्ष ॲड. अजित एम. देशमुख यांनी केली आहे.
दिनांक १४ सप्टेंबर रोजी हा मेळावा बीड येथील समर्थ मंगल कार्यालय, नगर रोड, बीड या ठिकाणी आयोजित करण्यात आला आहे. केवळ जिल्हास्तरावर नव्हे तर विभाग स्तरावर हा मेळावा आयोजित करण्यात आला असून या मेळाव्याला सर्व सक्रिय कार्यकर्त्यांनी उपस्थित राहण्याचे आवाहन करण्यात आले आहे. मेळाव्याला सुरुवात सकाळी अकरा वाजता होईल.
मेळाव्याला परिषदेचे उपाध्यक्ष संदीप जगताप सातारा, यांच्यासह कोषाध्यक्ष शिवाजी खेडकर पुणे, विश्वस्त विष्णू ढवळे छत्रपती संभाजीनगर, विश्वस्त अरुण बोबडे धाराशिव, यांच्यासह तुषार पाटील कुर्ला आणि गोवर्धन मस्के बीड यांचे मार्गदर्शन लाभणार आहे.
शासन आणि प्रशासन भरकटत चालले आहे. सामान्य जनतेची कामे नियमाप्रमाणे वेळेत होत नाहीत. त्यामुळे अशा प्रसंगी प्रश्न विचारणारी जनता तयार करण्यासाठी परिषद काम करणार आहे. लोकशिक्षण आणि लोकजागृती शिवाय आता पर्याय नसल्याने लोकांना आपले प्रश्न घेऊन स्वतः उभे राहता यावे, यासाठी हा लढा असेल.
आमच्याशी संपर्कात असलेल्या सर्व जुन्या कार्यकर्त्यांसह नवीन कार्यकर्त्यांनी देखील यात सहभाग नोंदवायचा आहे. त्यामुळे जास्तीत जास्त कार्यकर्त्यांनी प्रामाणिकपणे काम करण्याच्या उद्देशाने या मेळाव्याला उपस्थित राहावे. या मेळाव्यात पदाधिकाऱ्यांच्या नियुक्त्यांसह मराठवाड्यात जिल्हा निहाय दौऱ्याबाबतचे नियोजन देखील करण्यात येणार आहे. त्यामुळे कार्यकर्त्यांनी उपस्थित राहण्याचे आवाहन ॲड. देशमुख यांनी केले आहे.
______________________________________
