Sangharsh Yatra www.sangharshyatra.com
माजी मंत्री प्रा. सुरेश नवले यांनी प्रत्यक्ष बांधावर जाऊन केली नुकसानीची पाहणी
शेतकऱ्यांचे झालेले नुकसान पाहून मनाला प्रचंड वेदना- माजी मंत्री सुरेश नवले
बीड दि.२४( प्रतिनिधी)- माजी मंत्री प्रा. सुरेश नवले यांनी आज बुधवार दिनांक २४ रोजी अतिवृष्टीमुळे नुकसान झालेल्या उमरद जहांगीर, पारगाव शिरस, सोनगाव, साक्षर पिंपरी, पौंडूळ, खांबा, लिंबा, खलापुरी, जांब, आर्वी, तरडगव्हाण, गाजीपुर, हाजीपुर गावासह इतरही गावांची प्रत्यक्ष बांधावर जाऊन पाहणी केली असता अतोनात नुकसान झाल्याचे पाहून वेदना झाल्याचे सांगितले.
बीड जिल्ह्यात एकूण 11 तालुके असून शासन निर्णयामध्ये बाधित शेतकऱ्यांची संख्या 114773 म्हणजे सरासरी एका तालुक्यात फक्त आणि फक्त 10000 शेतकरीच या अतिवृष्टीमध्ये बाधित झालेले दिसून येत असून संपूर्ण जिल्ह्यासाठी फक्त 56.73 कोटी तुटपुंजा निधी मंजूर केला आहे. तो जिल्ह्यातील लाखो नुकसानग्रस्त शेतकऱ्यांच्या तोंडाला पाने पुसल्याप्रमाणे आहे. परंतु सत्य परिस्थिती अशी नाही याबाबत महसूल विभागाने त्यांच्या यंत्रणेमार्फत बीड जिल्ह्यातील सर्व तालुक्यांमध्ये पावसाने रुद्रावतार धारण केलेले असून जिल्ह्यातील सर्व तालुक्यातील छोटे मोठे नदी नाले आणि प्रमुख नद्यांनी पात्र सोडल्यामुळे शेकडो एकर जमीन पूर्णपणे खरडून गेल्याने असंख्य शेतकऱ्याकडे जमीनच शिल्लक राहिली नाही. ज्यांची जमीन पूर्ण खरडून गेली सकस माती राहिली नाही. मातीचा पोत ही बदलला पूर्ण पाण्याने वाहून गेली. या बाबत शासनाची नेमकी भूमिका काय आहे. हा महत्त्वाचा मुद्दा आहे. या सोबतच शेतमालाचे, शेती अवजाराचे, घराचे, छोट्या मोठ्या व्यावसायिकांचे, निराधार /गोरगरीबांच्या घराचे, पाळीव प्राण्याचे, पाळीव पक्षाचे आणि सार्वजनिक मालमत्तेचे अतोनात नुकसान झाले आहे. याबाबत सत्य परिस्थितीवर आधारित पहाणी करून बीड जिल्ह्यातील सर्व तालुक्यातील सर्व शेतकऱ्यांना, व्यापाऱ्यांना योग्य तो नुकसानीचा मोबदला देण्यासाठी पुनर्विचार करून सुधारित शासन निर्णय निर्गमित करून सबंध जिल्हावाशियांना शासनाने न्याय द्यावा अशी मागणी करून याबाबत शासनाकडे पाठपुरावा करणार असल्याचे माजी मंत्री प्रा. सुरेश नवले यांनी प्रतिनिधींशी बोलताना सांगितले. यावेळी शेकडो कार्यकर्त्यांसह प्रत्येक गावातील व्यवसायिक, शेतकरी, महिला, अबाल वृद्ध मोठ्या संख्येने उपस्थित होते.
