धानोरा रोडच्या होणाऱ्या कामाचे श्रेय फक्त जनतेलाच- बीड शहर बचाव मंच

धानोरा रोडच्या होणाऱ्या कामाचे श्रेय फक्त जनतेलाच- बीड शहर बचाव मंच

बीड दि.२८(प्रतिनिधी ): धानोरा रोडच्या सुरू होणाऱ्या कामाचे श्रेय फक्त सातत्याने आंदोलने करणाऱ्या स्थानिक जनतेच्या प्रयत्नांनाच आहे. कोणत्याही प्रस्थापित घराणेबाज श्रेय लाट्या दिवट्यांनी याचे श्रेय लाटण्याचा प्रयत्न करू नये असे बीड शहर बचाव मंचच्या वतीने शहरातील सर्व प्रस्थापित दिवट्यांना ठणकावत सांगितले आहे.
धानोरा रोडची स्थानिक जनता तसेच या रोडवर असणाऱ्या नऊ शाळेंमधील विद्यार्थी व त्यांचे पालक, या शाळेंमध्ये कार्यरत असलेले सर्व कर्मचारी अध्यापक व शिक्षक वर्ग, विद्यार्थ्यांची वाहतूक करणारी सर्व वाहनधारक, वाहन चालक मंडळी, धानोरा रोडशी जोडलेली सर्व छोटी गावखेडी, या गावांमधून बीड शहराला दूध आणि भाजीपाला पुरवठा करणारे सर्व शेतकरी अशी सर्वच जनता गेल्या वीस वर्षापासून भीषण हाल अपेष्टा या धानोरा रोडच्या दुर्दशेमुळे सहन करत आलेली आहे तसेच या रोडच्या विकासाच्या कामासाठी आंदोलने करत आलेली आहे. स्थानिक जनता गेल्या 20 वर्षापासून सतत या रोडच्या विकास कामांसाठी संघर्ष करत आहे. या सर्व स्थानिक जनतेने वेळोवेळी या रस्त्याच्या विकासासाठी मोठी आंदोलने केली आहेत. स्थानिक जनतेने अनेक वेळा या रोडच्या विकासासाठी निवेदने दिली आहेत. या सर्व गतकाळामध्ये ही सर्व प्रस्थापित घराने बाज ‘श्रेय लाटू दिवटे कमिटी’ आणि श्रेय लाटू लोकप्रतिनिधी दिवटे मंडळी कुठे होती..??
ही सर्व दिवटे मंडळी विकासाचे दिवे नेमके कुठ लावत बसलेली होती ? ज्या प्रकारे धानोरा रोडची दुर्दशा झाली आहे तशीच दुर्दशा सर्व शहराची आज झालेली आहे. या प्रस्थापित दिवट्यांनी काही कामे गुत्तेदार म्हणून जरी केलेली असतील तरी त्याचेही तीन तेरा नऊ बारा वाजलेले आहेत. बीड शहरात अतिशय निकृष्ट दर्जाची बोगस कामे या लोकांनी केलेली आहेत. यावर्षीच्या पावसाळ्यामध्ये आपण बीड शहराचे चाललेले हाल पाहत आहोत. धांडे नगर, स्वराज्य नगर भागामध्ये नागरिक काय मरणांतक हाल अपेष्टा सहन करीत आहेत हे आपण सर्वजण रोज पहात आहोत. शहराच्या या झालेल्या दुर्दशेचे श्रेय याच सर्व प्रस्थापित दिवटे कमिटीला जाते. जसे एखाद्या रस्त्याचा निधी मंजूर झाल्यानंतर श्रेय लाटण्यासाठी हे सर्वजण पुढे येतात तसेच शहरातील झालेल्या दुर्दशेची जबाबदारी घेण्यासाठी या सर्वांनी पुढे येऊन त्याचेही श्रेय घेतलेच पाहिजे. धानोरा रोड साठी यापूर्वीही मंजूर झालेले निधी कुठे कुठे वापरण्यात आले आहेत..? त्याचे काय केले हेही जनतेला समोर येऊन सांगावे. धानोरा रोडचा विकास जाणीवपूर्वक का प्रलंबित ठेवला याचीही कारणे जनतेपुढे येऊन द्यावीत. प्रस्थापित घराण्यांच्या प्रॉपर्टीज-इस्टेटस् ज्या ठिकाणी आहेत तिथे सिमेंट रोड,नाल्या रस्ते,दिवे, सर्व सुविधा आधी निर्माण केल्या जातात. मग दरवर्षी नगरपालिकेचा कर भरणाऱ्या जनतेला या सुविधा का मिळत नाहीत..?? तुमच्या तीन-तीन पिढ्या सत्ता भोगून राज्य करून जातात तरी जनतेच्या मूलभूत सुविधांचे प्रश्न ‘सुटतच’ नाहीत हा कसला विकास आहे, ही विकासाची कुठली पद्धत आहे…
?? अटल अमृत जल योजना व भुयारी गटार योजना का कार्यान्वित होत नाहीत, या योजनांची सद्यस्थिती काय आहे आणि या स्थितीची जबाबदारी कोणाची, याचे श्रेय कोणाचे, यासंदर्भातील जनतेच्या प्रश्नांची सर्व प्रस्थापित दिवट्यांनी व प्रस्थापित लोकप्रतिनिधींनी समोर येऊन उत्तरे द्यावीत. इतर मतदारसंघाच्या लोकप्रतिनिधींचा बीड शहराच्या विकास कामांमध्ये शून्य सहभाग आहे. त्यांचे या बीड शहरांमध्ये कसलेही योगदान नाही. त्यांनी आपल्या मतदारसंघातील नगरपालिका चांगल्या सांभाळाव्यात तिथेही खूप मोठी दुर्दशा आहे. तिथल्या गैरकारभाराची भांडी फोड करण्याची वेळ आमच्यावर आणू नका. इतर मतदारसंघाच्या लोकप्रतिनिधींनी फक्त आपल्याच मतदारसंघातील नगरपालिका नीट सांभाळाव्यात, बीड शहरांमध्ये नाक खुपसण्याची गरज नाही. तुमच्या नगरपालिकेतील गैरकारभाराचे वाभाडे काढायला आम्हाला वेळ लागणार नाही. धानोरा रोडच्या विकासासाठी जो निधी मंजूर झाला आहे त्याचे श्रेय फक्त स्थानिक जनतेच्या आंदोलनालाच आहे. तरी सर्व श्रेय लाटू प्रस्थापित दिवट्यांनी व लोकप्रतिनिधींनी याचे श्रेय लाटण्याचा प्रयत्न करू नका, असे बीड शहर बचाव मंचाच्यावतीने ठणकावून सांगण्यात येत आहे.