काळी दिवाळी साजरी करण्याचा इशारा देताच टप्पा वाढ निधीसाठी हालचाली गतिमान वाढीव वेतानामुळे दिवाळी गोड होणारच! …तर आंदोलन करणार -खंडेराव जगदाळे

काळी दिवाळी साजरी करण्याचा इशारा देताच टप्पा वाढ निधीसाठी हालचाली गतिमान

वाढीव वेतानामुळे दिवाळी गोड होणारच!

…तर आंदोलन करणार -खंडेराव जगदाळे

बीड दि.१०(आत्माराम वाव्हळ)- विनाअनुदानित शाळानां दिलेल्या वाढीव 20 टक्के टप्पा अनुदानासाठी निधीची तरतूद करावी या मागणीसाठी 8 आणि 9 जुलै रोजी आझाद मैदानावर ऐतिहासिक आंदोलन झाले होते. या आंदोलनाचे फलनिष्पत्ती म्हणून २५ ऑगस्ट २०२५ रोजी शासन निर्णय झाला. परंतु अद्याप ही वाढीव टप्प्याप्रमाणे अंशतः अनुदानित शाळेतील शिक्षक आणि शिक्षकेतर कर्मचाऱ्यांच्या खात्यावर वाढीव टप्प्याचे वेतन झाले नाही.
या वाढीव टप्प्याप्रमाणे निधीची तरतूद व्हावी यासाठी अनेक दिवसापासून आजी व माजी शिक्षक आमदार यांच्यासह शिक्षक संघटना प्रयत्न करीत आहेत. परंतु
शासनस्तरावर कोणतीच हालचाल होत नसल्याने विनाअनुदानित शाळा कृती समितीने वाढीव टप्पा नुसार निधीची तरतूद होऊन वेतन 20 ऑक्टोबर 2025 पूर्वी न झाल्यास 21 ऑक्टोबर रोजी दिवाळी दिवशीच राज्यातील सर्व शिक्षण उपसंचालक आणि सर्व जिल्ह्यातील शिक्षणाधिकारी यांच्या दारात काळी दिवाळी साजरी करण्याचा इशारा देण्यात आला होता. विनाअनुदानित शाळा कृती समितीच्या या इशारा आंदोलनाची शासन आणि प्रशासनाने गांभीर्याने दाखल घेतली. प्रत्यक्षात टप्पा वाढ निधी वितरण हालचालीस गती आली आहे. सोमवार मंगळवार पर्यंत निधी वितरणाचे आदेश राज्यातील सर्व शिक्षणाधिकारी वेतन अधीक्षक यांना दिले जाऊन प्रत्यक्ष विनाअनुदानित शाळेतील शिक्षक आणि शिक्षकेत्तर कर्मचाऱ्यांच्या खात्यात वेतन जमा करण्याच्या कामाला गती मिळू शकते अशी माहिती सुत्रांनी दिली आहे.

चौकट
…तर आंदोलन करणार
खंडेराव जगदाळे

20 ऑक्टोबर पर्यंत टप्पा वाढीचे अनुदान आदेशासह वेतन मिळाले नाही. तर 21 ऑक्टोबर 2025 रोजी काळी दिवाळी धरणे आंदोलन सर्व राज्यात करणार असल्याचे कृती समितीचे राज्य उपाध्यक्ष खंडेराव जगदाळे यांनी सांगितले

चौकट

ज्या जिल्ह्यात वाढीव टप्प्याचे आदेश मिळाले नसतील तिथे कृती समितीच्या पदाधिकारी यांना संपर्क साधून आदेश प्राप्त करून घ्यावेत.काही तक्रार किंवा अडचण असतील किंवा आदेश देण्यासाठी टाळाटाळ करीत असतील किंवा याबाबत घोडेबाजार सुरू असेल तर त्या जिल्ह्याच्या कृती समितीच्या पदाधिकारी यांना संपर्क साधावा असे आवाहन विनाअनुदानित शाळा कृती समितीचे राज्य उपाध्यक्ष खंडेराव जगदाळे यांनी केले आहे.
_______________________________