Sangharsh Yatra www.sangharshyatra.com
शिक्षणमंत्र्यांच्या आदेशाने एकल महिलांच्या मुलांना शैक्षणिक मदतीचा मार्ग मोकळा
शिक्षणमंत्र्यांचा संवेदनशील निर्णयाचे बाजीराव ढाकणे यांनी केले स्वागत
बीड दि.२४( प्रतिनिधी) :- महाराष्ट्र राज्याचे शिक्षणमंत्री दादा भुसे यांनी राज्यातील सर्व शाळांमध्ये शिक्षण घेणाऱ्या विधवा, घटस्फोटीत, परित्यक्ता अशा एकल महिलांच्या मुलांची संख्या संकलित करण्याचे आदेश जारी करून अत्यंत संवेदनशील व महत्वाचा निर्णय घेतला या निर्णयाचे स्वागत महाएनजिओ फेडरेशनचे बीड जिल्हा समन्वयक आणि लेक लाडकी अभियानाचे श्री. बाजीराव ढाकणे यांनी केले.
राज्यातील अनेक एकल महिलांकडे अल्प शिक्षण, रोजगाराची साधने नसणे, तसेच सासर-माहेरचा आधार न मिळणे अशा परिस्थितीत त्यांच्या मुलांच्या शिक्षणावर मोठा परिणाम होत असतो. हे वास्तव शिक्षणमंत्री दादा भुसे यांच्या निदर्शनास आणून देण्यात आले होते. त्यानंतर मंत्र्यांनी तातडीने संपूर्ण राज्यभरातून अशा विद्यार्थ्यांची आकडेवारी गोळा करण्याची प्रक्रिया सुरू करण्याचा निर्णय घेतला, ही बाब अत्यंत कौतुकास्पद असल्याचे बाजीराव ढाकणे यांनी सांगितले.
शिक्षणमंत्री भुसे यांच्यासोबत झालेल्या बैठकीत एकल महिलांच्या अडचणी मांडल्या व त्यांच्या मुलांसाठी काही उपक्रम राबवावेत अशी विनंती केली होती. त्या वेळीही मंत्री स्वतः या विषयाबद्दल संवेदनशील असल्याचे त्यांनी जाणवले होते. आज घेतलेला निर्णय ही त्याचीच प्रचिती असल्याचे ढाकणे यांनी सांगितले.
सध्या शिक्षण विभागाकडे गरजू घटकांची विविध आकडेवारी उपलब्ध असली, तरी एकल महिलांच्या मुलांची स्वतंत्र नोंद आजवर नव्हती. त्यामुळे या मुलांच्या शिक्षणासाठी योजनात्मक निर्णय घेणे शक्य होत नव्हते. आता ही आकडेवारी उपलब्ध झाल्यानंतर १०वी–१२वीची फी माफी, शालेय साहित्य, सहल, शैक्षणिक सुविधा अशा अनेक बाबींमध्ये शासन व शाळा अधिक ठोसपणे मदत करू शकतील.राज्यातील एकल महिलांच्या दोन मुलांना दरमहा २,२५० रुपये बालसंगोपन योजना मिळू शकते; परंतु अनेकांना या योजनेची माहितीच नसल्याने हजारो मुले वंचित राहतात. शाळेतील शिक्षकांनी ही माहिती एकल महिलांपर्यंत पोहोचवली तर वर्षाला प्रत्येकी २७,००० रुपये इतकी मोठी मदत अनेक विद्यार्थ्यांना मिळू शकेल, असे ढाकणे यांनी सांगितले.एकल महिलांच्या मुलांची संख्या मागवल्याने शिक्षण विभाग अधिक संवेदनशील होईल आणि या घटकाला स्वतंत्र ओळख मिळेल, असा विश्वासही ढाकणे यांनी व्यक्त केला. या निर्णयामध्ये शिक्षणमंत्री भुसे यांचे स्वीय सहाय्यक यांनीही महत्वाची भूमिका निभावली असल्याचे त्यांनी म्हटले. हेरंब दादा कुलकर्णी यांच्या मार्गदर्शनाखाली साऊ एकल महिला समिती राज्यभर एकल महिलांच्या विविध योजनांसाठी कार्यरत आहे. त्यांच्या मुलांच्या शिक्षणासाठी शिक्षणमंत्र्यांनी घेतलेला पुढाकार सर्व कार्यकर्त्यांना प्रेरणादायी असल्याचे ढाकणे यांनी सांगितले त्याच बरोबर ढाकणे यांनी शिक्षणमंत्री दादा भुसे यांचे मनःपूर्वक आभार मानले.
——————–
शिक्षणमंत्र्यांचा संवेदनशील निर्णयाचे बाजीराव ढाकणे यांनी केले स्वागत
शिक्षणमंत्री दादा भुसे यांनी राज्यातील सर्व शाळांमध्ये विधवा, घटस्फोटीत, परित्यक्ता अशा एकल महिलांच्या मुलांची संख्या संकलित करण्याचे आदेश काढल्यानंतर हा निर्णय अत्यंत संवेदनशील व महत्वाचा असल्याचे मत बाजीराव ढाकणे यांनी व्यक्त केले. या आकडेवारीमुळे एकल महिलांच्या मुलांच्या शिक्षणासाठी फी माफी, शैक्षणिक साहित्य, सरकारी योजना यांसारखे निर्णय घेणे सुलभ होणार असल्याचे त्यांनी सांगितले. शिक्षणमंत्री भुसे यांच्या या निर्णयाचे महाएनजिओ फेडरेशन व लेक लाडकी अभियान यांच्या वतीने स्वागत करण्यात आले.
————
